بات یہ ذہن میں اس کے بھی تو آ سکتی ہے

بات یہ ذہن میں اس کے بھی تو آ سکتی ہے
بے وفائی کی ہوا تازگی لا سکتی ہے
اب تو یہ سوچتی ہے میری توجہ طلبی
موت ہی گھر پہ مرے بھیڑ لگا سکتی ہے


مسئلہ یہ ہے کہ دن رات ہمیں فرصت ہے
اور فرصت بڑی تفصیل میں جا سکتی ہے
ڈوبنے بھر کا تو پانی نہیں اس میں لیکن
یہ ندی اب بھی مری پیاس بجھا سکتی ہے


مشورے مانگنا بے کار ہے خاموشی سے
بس یہ آواز میں آواز ملا سکتی ہے
عام انسان ہوں کمزور ہیں اعصاب مرے
کوئی بھی دل شکنی مجھ کو رلا سکتی ہے