آگ دل کو لگے آنکھوں کو دھواں لے جائے

آگ دل کو لگے آنکھوں کو دھواں لے جائے
غم بچھڑنے کا ہمیں جانے کہاں لے جائے
ایک ٹوٹے ہوئے پتے کی طرح ہیں ہم بھی
اب ہوا چاہے جہاں ہم کو وہاں لے جائے


ہم ترے دکھ کو اٹھائے ہوئے یوں پھرتے ہیں
جیسے کاندھے پہ کوئی اپنا مکاں لے جائے
ہم جو ڈوبیں تو کنارے سے نہ دیکھے کوئی
اور کچھ دور ہمیں آب رواں لے جائے


کوئی چہرہ ہے نظر میں نہ کوئی منزل ہے
بس چلے جائیں گے یہ راہ جہاں لے جائے
جانے کس وقت بدل جائے بہاروں کا سماں
اور مہکے ہوئے پھولوں کو خزاں لے جائے


جس طرف جائیے سیلاب زدہ ہے دنیا
کوئی رکھنے کو کہاں اپنا مکاں لے جائے