ہو لاگ درمیاں تو کوئی دل بھی تب لگائے

ہو لاگ درمیاں تو کوئی دل بھی تب لگائے
بیٹھے رہو امید یوںہی بے سبب لگائے
جو قرض ہجر سونپ گیا عمر کے عوض
شرط وصال اس سے کہیں بے طلب لگائے


کس جیب احتیاط میں رکھیں متاع دل
بیٹھا نہیں کہاں پہ وہ رہزن نقب لگائے
کھلتا نہیں ہے عقدہ شب انتظار کا
یاروں نے داؤ پیچ یہاں سب کے سب لگائے


چاروں طرف ہے آگ مگر درمیان شہر
بیٹھا ہے یار مجلس جشن طرب لگائے
بازار عشق سرد پڑا نذر جاں کے بعد
اب کوئی نقد نام یا نقد نسب لگائے


پھرتے ہیں لے کے بنت فصاحت کو میرزاؔ
اپنے تئیں خدائے سخن کا لقب لگائے
اس خوانچۂ سخن پہ تو سرمدؔ گزر نہیں
اس سے کہیں ہمیں وہ کسی اور ڈھب لگائے